Economia 1ºbacharelato

Este manual ten como obxectivo fundamental proporcionar aos bachaleres os medios para comprender o funcionamento da economía no mundo actual. Para isto é imprescindíbel unha perspectiva multidisciplinar que se fará realidade na medida en que os equipos de profesores e profesoras de cada centro promovan unha autonomía pedagóxica que sexa quen de integrar os referentes históricos cos aspectos políticos, sociais, filosóficos e territoriais máis relevantes. Os 16 temas, integrados en seis unidades, de que se compón o manual, recorren os diversos aspectos das actividades económicas, agrupándoas en núcleos significativos e relevantes. Os autores elixiron como contidos aqueles de maior poder explicativo coas achegas teóricas máis relevantes, fuxindo das técnicas matemáticas e concibindo un sistema económico aberto ao medio natural. Sobre estas concepcións faise unha mostra de posíbeis actividades, con carácter aberto e con propostas de distintos procedementos de traballo. O método empregado consiste en vincular os contidos conceptuais a outros procedementais que permitan estabelecer unha relación entre o texto e a realidade cotiá, buscando exemplos no contorno. Desenvolveranse así actividades de razoamento, descrición, cálculo, localización etc. que son accións que permiten acceder máis facilmente ao concepto e así entendelo mellor.